Pasakas.net

Pasakas

Čigānu valodā

Burvis un čigāns (Koldunos i rom)

Teicējs: Anatolijs Berezovskis

Samazināt teksta izmēru Palielināt teksta izmēru

An veš sis lodle romengo taboros. An da taboros dživdža romni. Lake sis feņu jekh čāvo – čāvoro berša dešu duj. Angīl būt berša romņaku rom meija, rom gija te rodel buti i pāle narišija. Romni dufiņdža so lako rom hāra si mūlu. Ne būt roma la nakandine, i de taboros gine rakirbena, so rom bikiņdža pesku duhos nalačeske. Jekh dives an da taboros pritrādija kupcos. Jov lija te pšīrel pir šatri i te rakirel romenca. Podgija i da romņake te rakirel. Kupcos iedikhja čāvores,i leski jakha zahačine. Ne čebi te phenes – da čāvoro sis lovko, zoralo i ušlo. Daj kupcos rakirla čāvoreski dake:

 

Otde mange ti čāves! Tu džives de čororipen, ne ke me tīre čāveske najavela nisavi nužda. Mande čāve nāni, tak so pošļi dova ki man najavela saro mīro barvalipen jačela leske. I so glavno, tīro čāvo mange nāni čužo, me boldžom tire čāvores, vijavelpes si me som tīro kirvo...

Kupcos zumadža, zumadža romņa, ne te podrakirel naštija. Jov hoļadija, leski jakha zahačine, i romni polija so lačipe najavela. I čačes, vāvir dives bibaht sis paše – lako čāvoro gija po  veš i pāle najavja. Vigijapes jake. Čāvoro vigija vešestir po feldica, doj les uže zažakirdža kupcos.

Ne so, čāvoro, kames pe greste te pokatinespes? Savo romano čāvo dolestir otphenelapes?

I kupcos zasvisķiņdža, i an feldica priuhtine duj kāle graja. Romanu čāvoro dikhel pe da grende i našti peskīre jakha te ottirdel, dasave henšti jone sis.

      -     Beš čāvoro, pe gresko dumo, a me bešava pe vavreste i trādas.

Bešle jone pe grende i trādine. Čāvoro dikhel so lesko graj nadžal pe phuj, a urņol pe boliben. I čāvoro polija, so zaphaņdžapes jov nalačesa, so dova kupcos si koldunos. Dēvel dād džinel, būt jone trādine, ne jone dotrādine ke huči berga i zmukhle pes tele pe samo berga. Koldunos čudža čāvoreske:

Dža rode kašta, zahačkirasam jāg.

Čāvoro zakedija kašta i jone zakerde jāg. Koldunos vilija tikno parnoro i čurdija de jāg. Feņo jov dava zkeredža. Phuj otkerdžapes, i otkerdžapes uzko hāņing.

Šun, čāvoro, so me tuke phenava. Me som de sāri da phuj samo bāro koldunos. Tu, me džinav so dova uže halijan. Daj , de da berga , si zahandlo sāro mīro mištipen. Me da mištipen vašti te polav kokoro, ne ande hāņing na moginav te zadžav . Le tuke zakaldovano angrusti. Ču pe tiro palcos, ne nanašav , a to tu hasjosja. Džasa tu tele phuj pe tute čurdenapes būt sapa. Nadara, pomahin angruščasa, i sapa jačena barenge. Tel phuj, tu dodikhesa udera, ne doj angil javela bešlo ļevos. Pomahin angrusti – i ļevos jačela bareske. Dūredīr javena vāvir udera, tu džasa andre i udikhesa tire da. Joj tut lela te mangel, tu la te obles – ne tu napača. Daja na tiri daj, ne nalačo. Ki tu la kandesa, joj tut rozriskirla pu šmati. Pomahin angruščasa pu laki strona i joj jačela bareske. Dūredīr javena trita udera, i pal lende – sāro miro mištipen... Priphande dova sunduko an do šello, me les vitirdava a potom vitirdava i tut! Me tusa javasam barvale, romano čāvo, feņu nazabistir, kēr dova sāru jake, sir me tuke pheņdžom.

Čāvoro phaņdža šello trujal peste i mukhjapes tel phuj. Jov dolges mukhjapes tele, poka koņčiņdžapes berga i tel pīre jov halija phuj. Toļkes jov jauja tele, pe leste čurdinepes būt sapa. Čāvoro pomahiņdža angrusti – i sapa jačle barenge. I dūredīr sis jake sir pheņdža koldunos. Lathlepen trin štubi, de jekh sis bešlo ļevos, de vāvir posikadžapes čāvoreski daj , ne de trito sis terdi sundukos lovenca. Čāvoro podtirdija sundukos ke šello, ne tirdinduj jakes khinija, so pribešja po sundukos te otphurdelpes. „Jakes najavela kolduno,” -jov podumiņdza,- „me tut piņčkirava! Sundukos tu vitirdesa, a man mukhesa daj, sop te najavel te des mange po pāš mištipen. Dava tuke navidžala!” Ne koldunos opratunestir del goli:

Šunes, čāvorale, phande sigedīr sundukos ande šello!

Pervo vitirde man,- čāvo phenel,- a sundukos me priphandava paše ko me.

Nat, pervo me vitirdava sundukos  a potom i tut!

Jone maškir pende hanepes i khošlepes i čāvoro naphaņdža sundukos ko šello. I koldunos zahoļadija i čurdija šello tel phuj.

Ne i mi kirņon tire kokali tel do phuj! – jov dija goli te našadija.

Čāvoro bešto pe da sundukos i gorjini: „Palso me zaphaņdžompes kada koldunosa! Kon man čudža te katinaupes leskire grenca! Te javes tu prokļato, kolduno, sāre ti zakoldovanu angruščasa!” Čāvoro ande holin stirdija palcostir angrusti i čurdija tele. Phuj zadrogiņdža i pusikadžapes bāro drakonos. Drakonos pudikhja pe čāvoreste te phučja:

Čāvoro, sir tu daj lathjantut? So tu kames?

Čāvoro piristrahandija da Drakonoske dičibnastir i lija te džal pe pāle dumesa, ne Drakono phenel:

Nastrahadžu mandir, čāvoro, me som tiro dād. Būt berša pāle da samo koldunos man hohadža, zakaldiņdža i čudža te rakhav leski mištipena. Te najavjasis tuke kada angrusti, tu ože najavjanas maškir džīde mānušende. Kada angruščasa pohlopinesa ke phuj, me svako molos javava paše ke tu, i vikerava sāru so tu kamesa. Ne mīro čāvo, so tu kames?

 Dāde, lidža man khēre dre taboros ke  mīri daj, i mištipena le khetane!

Lačes, mīro čāvo, sāro javela jake, sir tu kamesa, ne nabistir te les khetane angrusti – joj javela čebnu.

Čāvoro otčohņindžapes ande pesko taboros, i doj paše jāg angīl šatra sis bešti leski daj i začudžapes jasvenca pal čāvoreste. Joj jača phūri i sāri sivo. Čāvoreske sigadžapes, so jov nasis khēre feņu trin divesa, ne progine uže trin berša. Daj hotņakirdžapes:

Mīro čāvoro, me uže dumiņdžom so tut butedir nadikhava džīdes! Kaj tu sanas, rozphen že tu!

Čāvoro dake rospheņdža sāro, niso na zgārudža. Da poratir jone line te dživen an barvalipen i bahtales. Ne koldunos uhalija so romano čāvoro vigija phujatir, i zakamja te dolel čāvorestir peski mištipena. Javja jov ande taboros ko čāvo te phenel:

Otde mīri angrusti, čāvoro, de lačipnasa, bo otlava nahaļnes!

Čāvoro čurdija angrusti dre phuj i javaja Drakonos – leskīro dād.

Dikta dāde!- čāvoro phenel.- Dik, kaj jov si, da koldunos, kon pirikerdža tut Drakonoske i sporķiņdža sāro tīro dživipen.

Drakonos čurdijapes pre po koldunoste i zatasadža les. De do samo pora so feņu koldunos zatasadža, Drakonos jača mānušeske, i angīl čāvoreste sis terdo leskiro dād.

 

No latviešu valodas tulkojis Anatolijs Berezovskis.

  1. a
  2. b
  3. c
  4. d
  5. e
  6. f
  7. g
  8. h
  9. i
  10. j
  11. k
  12. l
  13. m
  14. n
  15. o
  16. p
  17. r
  18. s
  19. t
  20. u
  21. v
  22. z
  23. visas
 

Izmantošana nekomerciāliem mērķiem. Atsauce uz biedrību Ideju Forums obligāta.
e-pasts pasakas@pasakas.net 

Informācija grāmatu autoriem un tulkiem Mūsu draugi
Autortiesības © 2007 Biedrība Ideju Forums. Visas tiesības aizsargātas. Cube Systems – web dizains un izstrāde
  • Pasaku jaunumi
  • Pievienot Google