Pasakas.net

Pasakas

Čigānu valodā

Čordelindžis (Čorengu duhos – Demonos)

Teicējs: Anatolijs Berezovskis

Samazināt teksta izmēru Palielināt teksta izmēru

Dživdža jekh kraļis, i da kraļiske sis trin čāve i trin čaja. Kraļis čuviņdža so jov merla, čudža peskire čāvenge, te viden peskire pheņen palo rom dolenge kon javena ke jone po svati, - ne te otphenen jone našti nikoneske. Kraļis meja. Ne i trin pšala rešinde. Bešas pu grende i javen po svetos. Ne ternedir pšal dija goli:

Načalostir vidas pheņen palo rom a potom džasam de drom.

Pal phūredīr pheņate javja ruv. Phuredir pšal phenel:

Me pheņa nadava!

I vāvir pšal phenel:

      - I me pheņa nadava!

Ne ternedīr rakirla:

Mire pšala, amaro dad menge pripheņdža. I leskire lava me na piridža.

I otdija pheņa ruveske. Pal var pheņate javja orlos. Phuredir pšal pheņa nadija, i vavir pšal nadija, ne ternedir pšal nakandija len i otdija pheņa orloske. Pal ternedirjate javja rič. I phuredir, i vāvir pšal nakamle te den ričeske palo rom pheņa, ne ternedir la otdija.

      - Ne kana moginas, te las amare gren, i te džas an svetos.

Phuredir pšal phenel:

Mire pšala, živedir, možem amaro ternedir pšal vidija pheņen palo rom na čačunes.

Pšala bešle po grengi dume, i tradine hara, poka dojavdle ke jekh felda. Doj jone ļipinde tele pengi grendir, jekh čudža pre šatra, vāvir zakedija kašta, i zakerdža jāg te pupjen čajus. Kedi pšala pribešle. Te pohan, varikarik lačapes jekh murš. Kharde les Čordelindžis, i mangel pes:

Mire pšala! Javen tume mange sir dād i sir pšala! Den mange kuskos maro ! Trin divesa i trin rača nahajum ni kuskos. Phuredir pšal phenel:

Me rom dromitku mānuš. Mange khetene manca si jake but haben, te uhtilel feņu vaš mange.

I vavir pšal leske niso nadija . Ne ternedir pheņdža:

      - Den leske miri doļa, da dives me te hav nakamav.

Javja paše beļveļ, i jekh naštija te pašul, pal dova so leske sis te rakhel vāviren pšalen. Phuredir pšal podtirdija skamind ke pe pašedir, zahačkirdža momoli i umbladža peske ku šero. Pu skamind čudža čūri, lija lil i lija te kedel. Kaj lačapes, kaj nalačapes, ki jov podgija demonos i pheņdža:

Ušte pre: phen mange, kaj lidžal da drom, pal dova so me zablundiņdžompes.

Čavo otpheņdža:

Me nadžinav da drom: nadžinav da berga. Me džav an svetos, i me som dromitku mānuš.

Ne demonos naotmukhjapes:

Ušti pre i sikav mange drom, a to me tut znakhava!

Šun so rakires, a tu man vaštuvesa te znakhaves, - čavo phenela.

Demonos čurdijapes po čaveste, ne čavo uhtiļdža čūri čingirdža tele demonoske kana i čudža dre gono. Tašarlatir jov gija ko peski pšala i džangadža len pre, ne pal demonoste lenge narakirdža ni jekh lav. Javja vavir beļveļ. Pšala bešne te pohan, Čordelindžis jauja noko ku jone.

Mire pšala! Trin divesa me som nahaji. Den mange kuskos haben!

Phuredir pšal leske nadija niči, i vavir nadija, ne ternedir pšal otpheņdža:

Den leske da beļveļ miri doļa, me nakamav te hav.

Phuredir pšal phenela:

So , tu rakires miro pšal, ki ame dasam leske te hal, me nadžinas so jov menca lela te kerel!

Nastrahadžun pal dava, so jov kerla savo bedipen me les marava i zaphandava lesku muj, - otpheņdža ternedir pšal.

Javja paše rat. Kana sis te rakhel vāvire pšaleske. I jov podtirdija ke pe paše skamind, zahačkirdža momoli, i umbladža peske ko šero, čudža pe skamind čūri i lija te kedel lil. Daj , kaj lačapes,kaj nalačapes, javja ke jov paše duj šerengu demonos i phenel leske:

Ušte pre i phen mange sir khāren da drom i da berga vašdova so me zablundiņdžompes!

So javjom an da svetos, me trādav an drom i napiņčkirava da drom, i nadžinav da berga, kon daj si terdi.

Tu uštesa pre i pusikavesa mange drom, iļi me tut znakhava! – demonos phenela.

Napačava, so tu man znakhavesa! – čavo phenela.

Demonos čurdijapes pi leste, ne čavo uhtildža čūri i čingirdža tele demonoski duj šēre. Sāre štar kana čavo zgaradža peski dre gono! Tašarlatir jov gija ke peski pšala, džangadža len pre i rakirde, ne na pal dova. Javja pre trito beļveļ, pšala bešle te han. Čurdine pengi jakha. Pšala dikhena ki javja ke jone noko Čordelindžis. Phuredir pšal leske nadija niso, i vāvir nadija, ne ternedir pomangja:

Mire pšala! Oden leske da beļveļ miri doļa! Me niso nakamav, mi hal jov.

Mo pšal, tu kames te des da muršeske tiro maro, ne potom jov men hohavela!

Ne ternedīr pheņdža:

Ne, toge me les marā i zaphandava lesku muj.

Začemņadija rat, i te rakhel kerdžapes ternedīr pšal. Jo zahačkirdža momoli, umbladža ko pesku šero, podtirdija ke pe skamind, čudža po skamind čūri, i lija te kedel lil. Posikadžapes kārig ta trin šērengu demonos i dija goli:

Ušti pre i phen mange sir khāren da drom i da berga!

Me ternipnastir som an drom i nadžinav sav si da drom i sir khāren da berga, - čavo rakirla.

Tu uštesa pre i posikavesa mange drom, iļi me tut znakhava! – demonos phenela.

Ne čavo otpheņdža:

Napačava, vaštuvesa ļi tu man te znakhaves.

Demono čurdijapes po leste , te znakhavel les. Ne čavo uhtildža čūri, čingirdža tele demonoske sāre trin šēre, lija šov kana i čudža dre pesko gono. Ne zariškirinduj čūri, leske vigija so jov čiņdža tele šello, kaj sis umbladi momoli, momoli peija tele i murdija. Čavo podufiņdža: „Te rakhel Dēvel! Ki zahačkirava spička, šala uštena i phenena:” „Maro ternedir pšal možet so ņi buģ dodikhja i zastrahadija? Strahendir jov mučkirdža momoli!” Pudikhjapes trujal;, ternedir pšal dodikhja de dūripe jāg. Jov lija momoli i lija te džal po do rīg kaj dičadija jāg, te zahačkirel momoli nēvestir. Čavo dojavja ke jekh phurori i phučja latir:

Šun phurori, so tu daj keres?

Dikhesa, miro čavo, me rikirav khetanes čemnuma i mukhav svjatluma te džal peski dromesa, - joj phenela.

Muk lačedir pšīru rat te rikir mi javel haredir svjatluma! – čavo mangjapes.

Phūrori otmukhja rat, zarikirdža svjatluma i jača dasavo čemnuma, so nadodikhesa kokoro tire vasta. Čavo priphaņdža phurja ko kašt i pheņdža:

Dikhesa , phurori, priphandava tut ko kašt, poka nazahačkirava peskiri momoli.

I gija paš jāg. I so jov doj dodikhja? Paš jāg sis pašle štalvardeš te jekh čor, ne opre po jāg sis umbladi opre pīri, kaj karandine štār bakre. Čavo zahačkirdža peski momoli i nāšča, dorig krigal, so leski pīre lidžine, Uhtinduj jakes sir balval jov nouhtija pāš drom,i podufiņdža: „Dēvel Dād, da jāg me naštijum te lav!” Jov phurdija tele da momoļaki jāgori jauja pāle i džangadža dolen kon sis pašle ku jāg. Čora les iedikhle dživindepes:

       -    So tu daj rodesa? Daj nikon najavdža ņigdes. Sav tu san šmalu, ki nasis tuke strah te javes dārig!

       -    Kana pudikhen mi šmaluma! – čavo phenela, peski duj tikne palciņenca hadija tele da bāri pīri jāgatir i čudža pu phuj,potom noko duj palciņeņca čudža pāle do pīri pu jāg.

Čora phenena:

Ne so te phenes! Me sam murša, ne tu nin san murš! Me māraspes, te dolas trin šukār džūļen. Štalvardeš berš menge dova navidijapes. Ne kana javjan tu, murš sir berga, i me ni sam lače murša, kana m esam daj i kana menge javela baht len te dolas.

Jone zakedinepes an drom, gine gine, i dogine ku bāru khēr. Čora bučle jekh jekhestir:

Sir me te vihohavas len auri?

Sir te vihohavas? – phučela čavo.- Dava me tumenge phenava. Janen mange štalvardeš čveki me zamāra len an khēreski štaņa žinku opre.

Javen kana! Speršu andrāl mukhāman me , phanden truju mande šellu, pošļi mande jekh pal jekheste tele mukhentumen tume.

Jake sis! Ne čavo mardža sāre čoren tele, jekh pal jekheste. I čorengi bāredires, čavo mardža pošļe tele. Kana jov podgija ku khēr, otkerdža udera i pudikhja andre. Doj jov dodikhja pašļa jekha da trin šukār džūļendir. Čavo pupija pāņing, zahajapes gulipena i lija čajorja khetane pesa – vaš peski phūredīr pšaleske. Kana jov dojavja ke vāvir udera, otkerdža udera i dodikhja vāvir pheņa. Jov noko zahajapes gulipena i pupija pāņing te lija čajorja khetane – peski vāvir pšaleske. Kana jov gija ku ternedīr phen, otkerdža udera, zagija pupija gulu pībe, čamudija čajorja maškir lake brovi te lija la vaš peske. Phūredīr phen bučela:

So tu daj rodesa? Daj nikon pesku pīru nasikadža. Ki tut daj dodikhela mīri bībi, joj tut znakhavela.

Te sāre trin pheņa leske phende:

Dikta, lidža me dārig krig, būt feņu signes vašti, ki tu dova navikēresa, javela māri bībi te tut znakhavela!

Ne, ne!- čavo phenela.- Toge čebi džangavav pre pšalen.Živedīr zakērenpes, me zāra javava pāle.

Kana mamuj jov gija ku phūrori. Dikhja čāves joj pheņdža:

Kēr sigedīr, me jakes mrazijom, ki mērā šilestir!

Me tut mukhā pšīru, ne rat tuke čebisula te mukhes te dīs pu čihes atmukhes, vašdova ki angīl dova tu pu sige zalijan rat, te kerdžan dīs, kēr dova čihinkes! Ki tu uzkēresa dīs purazam , me tut lačā te vašdova mārā tele.

Čāvu gija ku peski pšala te džangadža len pre.

Mi pšala! Zakedenpes, bešas pu grende te sāre khetanes trādas krig! Me lačum trin pheņen, te dolen me lasam khetane!

Jone trādine te trādine, te javdle ku pheņa. Ternedir pšal uhča tele grestir, dija capla phūredīr pheņa te bešļakirdža pre pu greste pal phūredīr pšalesku dumu, uhtiļdža vāvirja te bešļakirdža pu gresku dumu pal vāvir pšalesku dumu. Kana uhtiļdža peski čajorja, ternedirja, hadija pu greste pal pesku dumu, te sāre dinepes an drom. Jone trādine te trādine, te daj purazam ternedir pšaleski čajorja zauhtiļdža čordelindžis. Phūredir pšal phenela:

Ne me tuke napheņdžum mu pšal, ki jov menge sav molos kerla bedipen.- A so pheņdžan tu?

Ne kana jov dolela mandir māriben te me zakērā lesku muj

Ternedīr pšal dija goli:

Džan angīl mi pšala! Jačen bahtale te dūredīr trāden bi mīru, me rišuvā pāle.

Te jov gija ku peski phūredīr phen. Phen les pudikhja, zadija goli:

Mu pšal! Tu dijan man ruveske, jov zāras jāla daj te nakhāla tut pre!

Joj čiņdža pšaleske šelčokos, pirikerdža les viņikake i čurdija pe phuj. Javja ruv i lija te rečin:

Tu šunes, mi romni me sungav mas!

So tu!- romni phenela.- Tu možem zariskirdžan save mānušes, i man podikhjan, nin kames te nakhaves pre.

I joj phučela:

-     So tu kēresas mīri phūredīr pšalesa, jov daj te javel?

-     Me les zahavas i vičungardavas.

-     Ne a mīre vāvir pšales?-I vāvires do samo.

-     Ne ternedīres?

      -     Savlahava pu mīro šēro, les me zažakiravas hotasa!

Toge phen čiņdža šķolkos viņikake i noko pirikerdža mānušeske.

Ruv phučja:

So kerdžapes, ki tu javjan ke me?

Šun! Čordelindžis čordža mīri romņa.

Ah, jake? Me trādā pal leste dives i rat, i ki me les lathava, me les nakhavava andre. Ne kana dža ki ti vāvir phen te ku orlos.

Čāvo gija an drom. Phen iedikhja les, lija te rovel:

Mu pšal, tu dijan man palu rom orloske, ne javela jov khēre tut zariskirla!

Joj čiņdža pšales šķolčkosa i pirikerdža les sujake, i čudža da suj ko peskīru kolin. Javja khēre orlos i zadija goli:

Tu šunes mi romni, me čujinav mānušesku mas!

So tu, - romni phenel, - tu zariskirdžan save mānušes i man podikhjan, nin kames te zariskires! Ne te javel mu phūredīr pšal , so tu lesa kēresas?

Vikļuvinavas leski jakha i čuvavas tuke len an ti vasta.

Ne, a te javel vāvir pšal?

I leske do samo!

Ne a te javel mīro ternedīr pšal?

Me les zažakiravas hotasa!

Phen čiņdža šķolčokos pur suj i noko pirikerdža mānušeske.

Vaso tu javjan?- orlos phučela.

Dikhesa, - čāvu phenela, - Čordelindžis čordža mīri romņa.

Ah, jake? Ne ki tu niso nakēresa, lestir zažakiresa bāre bidi. Čordelindžis urņula duj moli signedir si me. Me les te lačav, me vikļuvinās leski jakha, i kēravas les korores,- orlos phenela.

Kana čāvo gija ku ternedīr phen, i joj dija goli:

Mo pšal! Tu vidijan man pale rom ričeske. Javela jov khēre jov tut znakhavela!

Joj čiņdža pšaleske šķolčkosa, i pirikerdža les phabujake i čudža les po škafos. Javja khēre rič i lija te rečin:

Šunes! Me sungav mānušes!

Ne, džines so,- romni phenela,- tu hajan angil dova mānušes, i javjan khēre kames i man te zahas! A so tu kēresas, te javel daj mīro phūredīr pšal?

Zahavas les i vičungardavas.

A, te javel vāvir pšal?

I les zahavas i vičungardavas!

Ne a sir ternediresa?

Les me zažakiravas hotasa!

Phen čiņdža šķolkos phabujake i noko pirikedža da phabuj mānušeske. Rič phučela:

Palso tu jaujan daj?

Jake mange vigija,- čāvo otpheņdža.- Čordilindžis čordža mi romņa.

Ah, jake? Javen trādas pal leste palāl i dives i rat i uhtilasam zariskiras les pu šmati! Ne a tu džines, so te kēres? Beš pre pu gresku dumu i dikta – doj si bāre porti . Trāde gres, būt feņu džala, tuke baļvaļasa čebi te pēres druh da porti, ki tu jake nakēresa porti zaphandenape i tutir, i grestir jačena pāle masa. Andre , pu laču vast isi štala, i doj si umblado humutos. Čebi te les da humutos i te hades hučedīr tutir pre. Kedi ku tu poddžala graj, kon čuvela pesko šēro an da humutos, ču dava pu leski men.

I jake sis. Daj ternedir čāves iedikhja leski romni. Čāvo pusikadža joj mi javel pašedīr. Jov toge dija skokos pre pu greste, Signes bešļakirdža romņa pal pesku dumu i kļišča krigal. Jone kļišne dūredīr nāšinduj. An da pora Čordilindžusku graj lija te hrimitin:

      -     Hulaj, hulaj! Čaj rozgija!

      -     Būt kana si zigāris? Paņdž,-graj rakirla

      -     Žinku šov mukhasam lenge te džan, Čordelindžis phenela.

Toge ļipiņdža pi peski greste, čiņdža pu greste pre čupņasa te uhtildža len.

Šun kana,- jov phenela čāveske,- Me hajum tu māru te trin rača me čudžum tut te čerpines bok. Pal dava me tut otmukhava. Ne, ki tu javesa vāvir molos, me tut tele mārava.

Dava pupheņdža , Čordelindžis uhtildža romņa i lidžija pāle pu pesku khēr. Čāvu javja ku rič i rospheņdža:

Me dolijum pāle mīri romņa, daj man uhtildža Čordelindžis i pheņdža: „Me trin rača hajum tu maro, te čudžum tut te čerpines bok. Ne, javesa tu pāle vāvir molos, me tut tele mārava.”

Rič pusikļakirdža:

Nadža vāvir molos i naču tu šēro vaš džūļake.

Nā, me džava,- čāvo phenela,- mi mārel jov man tele raz kamela.

Ne, i dža,- rič phenela.- Feņu džasa andre po porti, tu dikhesa khūres. Ki vašti, uhte pu lesku dumu. Ki dava navikēresa tuke niso navijavela.

Čāvu uhtiļdža khūres pal savāris, dija skokos pu lesku dumu te hadija pu greste čajorja. Jov čingirdža pre pu greste čupņasa, te jone dine te nāšen. Ne phūri grasni, khūreski daj, zahrimitiņdža:

Hulaj, hulaj! Čaj rozgija!

Būt si zigāris?

Me našti te žakiras,- grasni otpheņdža.

Čordelindžis ošto perebučja, dava si ļi jake si leske phenela da grasni i bešja an zen. Jov kamja len te uhtilel ne, leske nisir dava navidijapes. Kana grasni khardža peski khūres:

Šun, mučāvu, savu bedipe me tuke kerdžom? Tu že pijan mandir thūd! Palso tu kana načurdes tutur tele da čāves i nazaštakires les?

Dova pušuņdža, khūro čurdija čāves tele dumestir i zaštakirdža les po kuski. Čordelindžis zakedija da kuski, začudža len de gono i čudža da gono pu čāveski gresku dumu.Graj dromesa dogija ku čāveski phen – orloski romni. Udikhja so kerdžapes phen lija te rovel. Ne orlos baļvaļasa urņadija pal svencunu pāņing pu Hagaraki hāņing, kon si an Meka, Kabaki khangīri. Zalača da pāņing te signes mukhinduj pes tele, orlos phagirdža peski jekh phak, ne javja pāle i aprādža da pāņingesa čāves.

So dasavu!- čāvu lija te rakirel.- Me sumas pašlo?

Amī, te fardes, an zorali lindra! Tu nauštijan, hoč svetus te piririšijasis! Ne kana puha i popi. Me sumas pal svencono pāņing i dikhes sir vaš tuke phagirdžum mīri phak! Ne daja si do paramiša. Tumenge pu sastipen!

 

No latviešu valodas tulkojis Anatolijs Berezovskis.

  1. a
  2. b
  3. c
  4. d
  5. e
  6. f
  7. g
  8. h
  9. i
  10. j
  11. k
  12. l
  13. m
  14. n
  15. o
  16. p
  17. r
  18. s
  19. t
  20. u
  21. v
  22. z
  23. visas
 

Izmantošana nekomerciāliem mērķiem. Atsauce uz biedrību Ideju Forums obligāta.
e-pasts pasakas@pasakas.net 

Informācija grāmatu autoriem un tulkiem Mūsu draugi
Autortiesības © 2007 Biedrība Ideju Forums. Visas tiesības aizsargātas. Cube Systems – web dizains un izstrāde
  • Pasaku jaunumi
  • Pievienot Google