Pasakas.net

Pasakas

Čigānu valodā

Kā velns gribēja atstāt čigānu savā vietā (Sir beng kamja te mukhel romes an pesko štetos)

Teicējs: Anatolijs Berezovskis

Samazināt teksta izmēru Palielināt teksta izmēru

Dživdža jekh rom. Jov būt gija po svetos i dikhja būt dživarnuma, so nadaradija jov nisostir. Jov sis pherdo zorjenca. Jov mardžapes jekh ekdženo ričesa i umardža les. Ne i riča mukhle pengīre znaki pe leskīre masa – romeske sāre leski masa sis ričengi najendir an šrami. Rom sis sbit kālo i strašno , a palo vidos beng so beng. Toļko rogi nasis. Tel phūripen rom uže trujal na trādelas; lija te dživel dre gav an gavesko koncos. Gādže lestir darnas, načuvenas pengīro pīro de leskīro khēroro, i daže leskire semenci javenas ke jov redkes.

Zadumiņdža phūro rom te zatačkirel lazna. Zalidžija rekatir pāņinga, zakerdža jāg, bešča po lavka i lija te parinelpes. Ne ože sis pāš rat. Rom parinipes, parinipes – marla pes viņiksa pir peskīre boki i dumo, i daj šunela varikon podgija ke jov paše i rakirela:

Dža dūredir!

Rom podtirdijapes dūredir, dumini so pritradija lesko bļizko mānuš. Paros an lazna būt, so našti te dikhes nikones.

Beš, rom phenela, daj tuke javela štetos.

Jakes najavela, tirde tut pašedir ke fenštra – čužo gloss otpheņdža.

So tuke iščo štetos kuti? – phūro rom dživiņdžapes, ne podtirdijapes pašedir ku fenštrica.

Kana si lačes. Proparin man kana! Me lazna sbit kamav.

Ne kaj tu san? – phūro rom phenela – Me tut an da duhos našti ti zadikhav.

Ne daj me, pašlo pe lavka

Phurom lija les te parin viņikasa, ne, kones parini- jov nadžinel.

Šun phuroma, podčurde duhos! Zaphēr pāņing pirjatir. Phurom hoļasija.

Ke tuke čebi, kokoro i ušte. Mande uže nāni zor. I ternedir tu san mandir.

Ha, ha! – gloss zasaņdža! – Ternedīr? Me tusa de jekh berša.

Rom hoļasija.

Kaj tu garavespes? Pal so me na dikhav tīro muj?

Pal so te dikhes mīro muj? Me som tīro dvoiņikos!

Savo tu dvoiņikos , rom zasaņdža i prokhoščapes .

Ne dova kon bešlo sis ke jov, lija te sal jake zorales, so sāri lazna zadrožiņdža. Ne kana purano rom polija, so daj si bango nalačo. Jov pribešja te popravin vangara dre bov i udikhja : pe kotlos sis bešlo, i angil leste visinde leskīre pīre – ne na pīre a naja! Beng,- romeske dogija.

Čihedir, čihedir - phuroma, na zacepinpes pal mīre pīre!

Rom podikhja opre i udikhja benges. Dasavo jov sis pribešlopes : rostosa na baro, porori zabaņčkirdi, čurdija pre po pšiko , an šēro rogi. Vičudža čib i lija te drazņinel. Beng so beng! Ne muj bengeske točno dasavo sir phūre romeske.

Rakirna, so tu san zoralo murš.

Tu mīri zor kames te podikhes? – phučel rom.

Ne beng rakirel :

Podikhav iļi na, ne te viparinav me tut kamav, tu man pariņdžan a kana me tut proparinava.

Džinav tīro bengitko paruma! Ne- me javel, parin ke kames, beng te lel tut!

Beng uhtija tele kotlostir, romeske pe pšike i lija romes te trādel piri lazna. Kaj jov les na trādija : an topka, vitirdija les druh truba, zatrādija tel parilka, čuķ na čurdija les ande kotlos. Rom kamel les te ščurdel pestir, ne beng ke jov jakes pricepiņdžapes, so rom našti nisir les te ščurdel pestir. Pe koncos bengeske dohaja te katinpe pe romeste. I jov leske phenel:

Šun, phuroma, phagiraspes! Tu že san zoralo. Iļi dava si hohanipe?

Rom hoļasija. Jov kamja te prosikļakirel benges.

Ladno, phagiraspes. Ne daj si kuti štetos. Vidžas auri dre feldica.

Beng sis soglasnu. Sāre duj vigine laznatir an feldica i line te phagirenpes. Line te phagirenpes po nabutka, ne potom rozginepen na po šutki.

Beng najenca viriskirdža romesku dumo, sāro de šrami i ratfalo rom rikirdžapes. Kārig tašarla beng romes khiņakirdža tele i kedi rom butedir naštija te phagirelpes, vitirdija romeski mostir dant i pheņdža :

Jakes, kana tu džinesa sir manca te phagirestut!

Tīro dant me lava an zalogos. Javesa mange pokorno, poka dživesa.

Beng najesa vikerdža an romesko dant džirka, huridža druh gresko bal i umbladža dant peske pe men. An do pora zagabade trita bašne.

Ne, jač sasto, phuroma, siges udikhasapes – beng dija goli i našadija.

Phurom dolges sis pašlo bez pamjaķi, jake fardes les zameņčiņdža nalačo! Ne lestir otgija, jov dogija ke rekica, te popjel i te othiņol.

Rom ņikoneske pal dava niso narakirdža, so lesa rati kerdžapes, ne an lazna butedir nagija.

Ne beng leske nadija pokojos. Bengeske rom čebisadija iļi nat? A možet čačunes jone sis dvoiņiki? Ne mi javel sir, ne podjavja rat, i beng lačapes an phūre romeskīro khēr. Sāre duj bešle, pjena čajos, khelena patrja, sir hobe jone sāru pengo vekos nasis vrogi.

I beng zarakirdža:

- So ame da patrja jakes prostes khelasam? Khelas pe uzsloviji. Vikhelesa tu, me vipolņinava tīri čebnuma, a vikhelava me, tu vipolņinesa so me kamava. Line sāre duj te khelen. Ne beng romes hohadža - vikheldža.

- Lačes, rom phenela, phen tīri čebnuma.

- Ah, tu dilno rom, me tuke phenava dasavi čebnuma, so tu sāro tu vekos javesa man te podrikires. Kana šun: le lopata i dža po veš.

- So ame doj kērasam? – rom phučela

- Le feņu, le i nabuč! Tu prokheldžan a kana kēr dova, so čuvena i navirakirtut!

Nāni vihodos. Rom uridžapes, lija lopata i gija pal bengeste palal. Gine jone druh veš, pirigine reka, gine pašil ovragos i noko zagine an veš. Jone vigine an vešeski feldica i doj lačle hāņing! Beng terdija i rakirla:

Dža an hāņing, phuroma! I le doj rokines. So lathesa, sāro javela tīro!

Rom gija an hāņing i lija te rokinel. Nabutka podrokiņdža phuj a doj – saunakune love. Rom začudža pherde peski kisika saunakune lovenca, ne beng sala:

Le butedīr, vaš tuke mange nāni žaļ...

Do poratir rom lija te dživel an barvalipen. Čudža nēvo khēr,kiņdža kuč gres, jekh lavesa te phenes – dživel i nadžinel, so jasavo si fujipen.

Kana jone sāre duj bengesa line te džan po zakaldovano hāņing pal love, pritom každo rat. Rati rokinen, divese pašle. I jekh rat rom dikhja suno. An suno leske posikadžape beng, i lesa khetane – bengeski baba. Jone sāre duj line te rakiren.

Ne, rom skores javela an tīro štetos? – bengeskīri babka phučel

Kada rat jov dokopinapes ke pipka, beng phenel, feņu jov podlela pipka i zatirdela latir thu, do poratir jov jačela ko daja hāning prikovano. Vibarjona leske rogi i naja. Ne po muj jov si pe mande pohože, so našti te rozles, kon jov a kon me.

Halijom, mīro vnukico, so tuke dohaja te rakhes da zakaldovano hāņing!

Rom uštija sāro ande jekh  poti i dumini: „ Ah, tume bibolde, kamen man te obhohaven! Ne terdžon, me tumenge posikavava!”

Podjavja rat. Beng javja pal romeste i sāre duj gine ke hāņing ande veš. Rom po šello zmukhjapes tele. Ne napogija hāra, so jov lija te hadelpes pre pe phuj.

So kerdžapes? – beng phučel.

Ne, džines kicik dolges jakes vašti? Kopinav ože celo čon i šello jača krotko!

Beng lija te dumin.

Ne, so kana me te kērav?

Prosto kēribe: Zle tīre meņatir gresko bal, priphande ke dava šello i javela sir čebi!

Beng pudikhja, nahitrini ļi jov so, ne rom terdo, prostes i hala phuss.

So kērasam, priphandasam paše iļi khēre džasam? – rom phučel. – A to me jakes proterdžovasam poka zagabana trito molos bašne.

Ladno, phande paše, beng de holin phenela, i zlija tele meņatir gresko bal.

Rom priphaņdža gresko bal ke šello i gija an hāņing.

Lija jov te kopin, dikhel – pipka, šūkār vičindli na prosto, a pipka vičindli bengeski mosa. Ande jakhengo štetos rubini hačon, so jāga. I dičol so dava muj salpe.

Rom lija pipka i vigija hāņingatir.

Dikta, beng - so me lathjom!

Dava i menge si čebno! – beng shotņakirdžapes.

Khinijan. Perekurinas!

Pal so nā, kurinas – rom phenel.

Jov zakerdža nabāri jāgori. Bešle ke jāgori, začudle ande pipka tabaka.

Ne romano čāvo, prikurini pervo!

Ne rom čorahanes čudža pre pe tabaka kirne brezitka kirnipena: prihačkirdža len, ne i pipka hačola. Kokoro vičuvelpes so jov kurini.

Eh, savo zoralo thuv! – rom lija te kašļin.

Le tu, beng mange ože začudža mo duhos.

Beng lija pipka i phenela:

Ladno, romano čāvo, pal tute i me vašti te pobalinaupe  da tabačkasa.

Beng zasaņdžapes i zatirdija thuva lačes hor.

Ranes hotņakirespes, rom phenela, Kamjan man te hohaves, ne tuke dava navidijapes!

Rom uhtildža benges, priphaņdža šellesa ke hāņing i doj les mukhja. Ne peskīro dant zlija greski balestir i čurdija ande jāg. Dant zahačija i an do samo pora našadija i hāņing i beng!

Rom podikhja trujal peste – i udikhja so jov si ande peskīro khēr.

Do poratir jov benges nadikhja!

 

No latviešu valodas tulkojis Anatolijs Berezovskis.

  1. a
  2. b
  3. c
  4. d
  5. e
  6. f
  7. g
  8. h
  9. i
  10. j
  11. k
  12. l
  13. m
  14. n
  15. o
  16. p
  17. r
  18. s
  19. t
  20. u
  21. v
  22. z
  23. visas
 

Izmantošana nekomerciāliem mērķiem. Atsauce uz biedrību Ideju Forums obligāta.
e-pasts pasakas@pasakas.net 

Informācija grāmatu autoriem un tulkiem Mūsu draugi
Autortiesības © 2007 Biedrība Ideju Forums. Visas tiesības aizsargātas. Cube Systems – web dizains un izstrāde
  • Pasaku jaunumi
  • Pievienot Google