Pasakas.net

Pasakas

Čigānu valodā

Laimes puķe (Cvjatos kon dela baht)

Teicējs: Anatolijs Berezovskis

Samazināt teksta izmēru Palielināt teksta izmēru

Dživdža čorori, phūrori peski jekdžene čāvesa. Pašli pu čīben, angīl mēriben daj fardes rovdža pal čāveste; i rakirla:

Mīro tu čāvoro, dža an svetus baht te rodes, me Signes mērava, te daj an da gav najavela nikon, kon pal tute phenela laču lav , pal dova ki tu san čorore mānušengo čāvo. Ne, ki tu man pugaravesa, jav an pāš rat pu mi mogilka i shušč cvjatos, so lela te barjul pu mīri mogilka, te zrak daja sir tire jakha, pal dava so   adava cvjatos tuke sikavela drom ke tiri baht.

Daj meija, i čavo la pogaradža. Dojavja pāš rat, i jov gija pe dakiri mogilka, i doj udikhja so barjul sbit šukār šiņu cvjatos. Jov la šhušča i zgaradža an škatulkica. An de vāvir dives čāvoro gija ande svetos i zalača langale ruves, kon mangjapes:

Lačo mānuš, vitirde mi pīrestir puļa!

Čāvoro les kandija, i ruv leske phenel:

Kana me tuke iščo našti te otdav lačipe pal tiro lačo dži, ne vitirde mi postinestir jekh bal, i javela čebnu tuke mīri pomoga, phurde pre po da bal!

Čāvu vitirdija ruvestir bal, i nogaradža da bal an škatulka kaj sis šiņu cvjatos i gija dūredīr an svetos. Jov uže hāra gija po svetus, ne baht nikaj jov naštija te lathel. Daj jov otripirdžapes so pheņdža leske leskiri daj  angīl mēriben, i jov vilija škatulkicatir šiņo cvjatos. Gorjenca pherdu, jov čudža da cvjatos po phuj, i so kerdžape! Cvjatos hadijape de boliben i khardža:

Jav pal mande! Man nadikhel nikon, krome tu, pal dova jav pal mande šmales, me lidžava tut doj kaj si tīri baht!

Cvjatos urņadija angīl a čavo gija pale late palal.Beļveļe jone zagine de veš, doj čāvu dodikhja ļisos, joj rakirel:

Miro, lačo mānuš, an miro kan zagija birlin i mange si dukhanes. Vitirde la mīre kanestir!

Čāvu pušuņdža, i ļisos phenela:

Pal tiro lačo dži, me tuke otrpeskirava, i lačipen tuke viphenā. Tu rodesa ti baht, ne tu la sigedīr nadolesa poskir tuke čebisula te jačes bučakīreske ke bibahtali urma, kaj trin dīsa, jekh pal jekheste čebisula te lidžas i te rakhes lakirja saunakune rogengi gurņa i čebi te rakhes, da gurni te najavel khēre bi tīru,ne ke tu dova navikēresa joj tut lela te khošel. Ke tuke dava videlapes te zrakhes da gurņa, preskirben pale da buti buč stādik, kon si umbladi pale bov. Kon da stādik čuvela pe peskīro šēro, doles ņikon naštuvela te dodikhel.

Dova vipheņdža ļisos, i našadija, ne čāvo lija šiņo cvjatos, zagaradža la de škatulkica i čudža pes te pašul. An vāvir dives jov vilija cvjatos škatulkatir, i mukhja joj mi džal angīl, a jov gija pale late palal, joj leske sikadža drom. Jake jone dojavdle ke bāro sastrunu khēr, i cvjatos les posikļakirdža:

Le kana, i ču man pāle an škatulka i avri vilesa man feņu, ke me tut pukhārava!

Feņu čāvo nogaradža šiņo cvjatos an škatulka, otkerdepe sastrune khēreski udera i po šļenkus vijavja britku phūri.

So tu daj rodesa? – phūri phučja.

Kamav te kerav buti ke tu, - čāvo otpheņdža.

Lačes, - phūri phenela, - javesa mīro bučarno. Tuke javela te lidžas pe felda i te pridikhes mi hal mīri saunakune rogenca gurni, ne ni jekh molos joj našti te javel khēre sigedīr sir feņu beļveļe.Bi tīru, ke javela gurni khēre ekdženi jake sir pheņdžum, me tut mārava tele. Ne ki tu trin moli javesa gurņasa khetane khēre, tu vaštuvesa te vikedes an mo khēr dova, so tu kamesa.

Čāvo phurjasa dorakirdepes, i čāvo vilidžija gurņa pe felda te hal. Feņu sāre duj sis ani felda, gurni kamja te uhtel khēre. Čāvu vitirdija ruvesku bal, phurdija pre, i ruv sis paše i jaņdža pesa khetane būt tišči vāvir ruven. Da ruva opline da gurņa trujal i namukhle da gurņa avri štetustir. Beļveļe čāvu trādija gurņa khēre te gija te pašul. An vāvir dives sis do samo, te an tritu dives čāvo jaņdža gurņa ke urma, joj mukhja jov mi vilel an pesko khēr so jov kamel. Jov vilija stādik te lija la tele kaj joj sis umbladi. Urma zadija glosa te kamja te vitirdel čāveski vastendir da stādik, ne jov signes čudža stādik pu pesko šēro, te urma butedīr naštadija les te udikhel. Jov nāšča , te ki leske ože sis šmaluma, jov nogārudža stādik an škatulkica i pušuņdža ke les cvjatos kharla:

Vile man avri!

Čāvo vilija cvjatos i gija pale late palal, Jake jov hāra gija po svetos, te nadžiņdža butedīr so leske te kērel, jov dojavja ande bergi. Jov khinu pribešja i šunela ki cvjatos leske phenela:

Nogarav man an škatulka!

Jov kandija la, ne kokoro atmukhjapes te popašul. Uže sis beļveļ, ne čāvo sis pašlo. Pusikadžapes čon an boliben, i dičadine kāle bergi. Našuņdžandija niso, bergi sis pašle sir mūle mānuša. Varikaj pušuņdžadija bāri gloss, čāvo dijapes pre lindratir. Strahendir pudikhja pes trujāl, jov udikhja bāri žaba, da žaba tirdija pal peste palāl, pal pīre rikirinduj, duj veršokitko tikne mānušores. Čāvo dija pes pre, te čurdija an žabate bāre baresa. Žaba atmukhja mānušores pšīru. Mānušoro, signes uhtija paše ke čāvo te mangja les, mi lel les pre po vasta. Čāvo kandija les, i tikno mānušoro phenela:

Tu vilijan man šmerčatir, ne kaj me te nogaravasmen? Da žaba pu čačipe si do bibahtali urma, joj zakharla būt šelen žaben , te dola kerna māri šmerč!

Čāvo signes vilija škatulkatir peski stādik te čudža po šēro. Feņu jov dava skerdža, zagine būt tišči žabi i line te roden čāves, ne naštine le te dodikhen. Čāvo khetane do tikne mānušoresa gine dūredīr, i ke jone tašarlatir dojavdle ke bāri berga, mānušoro pheņdža:

Muk man tele i jav pal mande! Me kērava tut barvales i bahtales.

Jov lidžija čāves andre an bergaki džirka, trin moli piemardža ke bergaki štaņa i pukhardža:

Me pšala, otphanden udera. Javen zalen gostjos.

Otphandlepes udera, i mānušoro pheņdža:

Gāru tele tīri stādik, te vaštuven mīre pšala tut te udikhen.

Čāvo nogaradža stādik an škatulkica, i jone gine andre an šukār kaštuni štuba. Dūredīr jone pirigine an sastruni štuba, doj sis pašle būt puški. Dūredīr sis rupuvi štuba, pherdi rupuve fļagenca. Jone pširade iščo jekh udera i zagine an saunakuni štuba. Doj sis būt tikne mānušore  zakedinepe trujāl peski kraļiste, kon sis jasavo tiknu sir vāra tikne mānušore, ne leske sis rupuvi brozda. Mānušoro lidžija čāves paše ke kraļis i pheņdža:

Mīro saunakunu kraļi! Urma kon dživel an bergi, pirikerdžapes žabake i kamja te mārel man tele.

Kraļis pudikhja pe čāveste i pheņdža:

Tu vilijan šmerčatir mīre mānušes. Me vaš dava tuke dava jasave kēribena, kon tut kerna bahtales.

Jov vitirdija avri peskire brozdatir rupuvo bal i dija dava čāveske pheninduj:

Ke javela tuke hindipen, phurde pre po da bal, i me sāre mi mānušenca džava tuke te pomožinav.

Jov čāves lidžija an rupuvi štuba, dija leske rupuvi fļaga i pheņdža:

An da fļaga si pāņing ne jov najačela kutedīr, ke tu da pāņing rāvesa bu bar, bar jačela saunakunu.

Jov lidžija čāves an sastruni štuba, dija leske puška i pheņdža:

Da puškatir tu popēresa an sāro , kaj tu kamesa. A kana jač sastu i bahtalu, vaš dava so nijekh phujaku mānuš našti te jačel ke ame hāredīr.

Tiknu mānušoro lidžija čāves avri i pheņdža;

Tu signes dojavesa ke šļankitku  berga, kaj drakonos rikirla an stāriben trin šukārdīr džūļen an svetos. Ke tuke javela savo bedipen, khār men pe pomoga tuke.

Jov čāves trin moli nočamudža i gija ke pesko kraļis. Zarakirdža cvjatos:

Le man avri!

Čāvo pušuņdža i gija pal cvjatoste. Tel beļveļ jone dojavdle ke ježeros i atmukhlepes po bregos. Atmukhjapes an čār, jov iedikhja so an ježeros dena plima trin saunakune papiņa. Jov dija capla puška te čudža pre pu samu tiknedīr papiņate i duj vistrahade rozmukhlepem, ne tiknedīr pārkedžapes šukār čake i pheņdža:

Tu kerdžan so me jačum mānuš, mandir i mire duj pheņendir lija krig dava drakonos kon si an šļankitku berga. Me sāre mīre džesa javava tīri romni, ke tu vaštuvesa te kēres mīre pheņen noko mānušenge.

An vāvir dives sāre duj dogine ke šļankitku berga, kai dživdža drakonos i duj pheņa. Čāvo nogaradža an škatulka cvjatos, vitirdija rupuvo bal i phurdija pe leste. An do samu pora pusikadepes būt tišči tikne mānušore, i lengo kraļis dija goli:

Me džinav, so tu kames. Tu kames te pēres andre an šļankitku berga, ne našti. Ne me tuke pumožinasam.

Tikne mānušore line te phagiren, čingiren, kaļinen i signes an šļankitku berga vikerde bāri džirka. Dokerde pengi buti, tikne mānušore našadine jake signes, jake sir jaudle. Ne an šļankitku berga šuņdžadine bāre glosa, te dorig viurņadine duj saunakune papiņa. Čāvo uhtildža peski puška, čudža pre pu lende, i vidija karje, papiņa peine tele i pirikerdepen duj šukār terne džūļenge. Ne kana avri viližiņdža i drakonos čurdijapes pre po čāveste, ne čāvo čudža pre pe drakonoste peski puška. Drakonostir najača pāle niso, okromi thuva, i balval da thuva rozphurdija. Ke dava sāro zakoņčiņdžapes, de boliben hadijape pre šiņo cvjatos i pheņdža:

Jač bahtalo mīro čāvo! Me som tīri mūli dakīro duhos, i mange čebi te džav pāle de boliben, kārig me javjum.

Šiņo cvjatos našandija, a čāvo lija romņa, ternedirja trin pheņendir. Signes vigine palo rom i vāvir duj pheņa, i kana jone dživdle bahtales, barvales i čačunes.

 

No latviešu valodas tulkojis Anatolijs Berezovskis.

  1. a
  2. b
  3. c
  4. d
  5. e
  6. f
  7. g
  8. h
  9. i
  10. j
  11. k
  12. l
  13. m
  14. n
  15. o
  16. p
  17. r
  18. s
  19. t
  20. u
  21. v
  22. z
  23. visas
 

Izmantošana nekomerciāliem mērķiem. Atsauce uz biedrību Ideju Forums obligāta.
e-pasts pasakas@pasakas.net 

Informācija grāmatu autoriem un tulkiem Mūsu draugi
Autortiesības © 2007 Biedrība Ideju Forums. Visas tiesības aizsargātas. Cube Systems – web dizains un izstrāde
  • Pasaku jaunumi
  • Pievienot Google