Pasakas.net

Pasakas

Čigānu valodā

Pulksteņmeistars (Zigarjengīro)

Teicējs: Anatolijs Berezovskis

Samazināt teksta izmēru Palielināt teksta izmēru

Dživdža peske čororo čāvoro, kon gija de svetos te sikļul peske savi buti. Gija jov dromesa i zadija jov po drom rašas.

Kaj tu džasa, mīro čāvo?

Kamav te lačav dasave mānušes kon sikļakirla man savo promislos.

Šun, čāvoro, ke me tuke lathelapes štetos. Mande uže si dasavo čāvoro, sir tu. Mande si šov gurve i plugos. Jav ke me po buti, moginesa te pahines mīri phuj.

Čāvoro gija lesa khetane, lija plugos, dija andre gurven, gija pe felda i pahiņdža duj divesa štetostir. Pašil gine Baht i Godi. I Godi phenel Bahčake :

Dža dre leste!

Ne Baht nakamja te džal. I dre čavoreste  gija andre Godi. Si dava vikerdžapes, de do samo pora, čavoro čurdija plugos, čurdija tele peskire pirendir teraha so dija leske rašaj i dija te nāšel feldatir. Ne vavir čavoro uhča pal leste palal.

Na nāš, pšaloro, na nāš krig!

Otjač, me kada buti na kērava!

Čāvoro javja de jekh foros, ne da foros sis dasavo bāro, sir Buharesta. Lesko drom gija pašil kaj kerna zigarja. Jov podikhja andre i udikhja čāvoren, kon kerde buča ku zigarjengīro. Jekh bučitko lestir phučela :

So tu san terdo i dikhesa?

Čāvoro otpheņdža:

Kamel pes, i som terdo. Dikhav, so tume sbit siges kēren buti.

Javja hulaj i phenel:

Šun, čāvoro, jav ke me pe buti, po trin berš, pal da pora tu sāro visikļosa i javesa dasavo zigarjengīro, sir me!

Jov leske pripheņdža :

- Pervo berš tu lesa te čingires kašta, podrikiresa jāg de bova, bešesa ke skamind i lesa te dikhes , sir kerna buti vāvira i lesa te sikļos.

Ke ada zigarjengīro uže deš paņdž berš sis terdo kraļisko zigāris. Nikon les naštija te zakērel. Dārig sis otjandle zigarjengīre i Parižostir i Venatir, ne te zkēren zigāris nikon lendir naštine. Jekh dives kraļis pheņdža so otdela pāš phuj doleske, kon zalidžala zigāris.

Ne nikoneske dava na vidijape. An zigāris sis andre biš te štār giļa, i každo da jekh giļatir,  so javelas kada zigāristir, kraļis jačelas svako jekh giļatir ternedir.

Podjavja svenkos – Patradži. Zigarjengīro peskīre čāvenca gija pe khangiri, i khēre jača phūri phūrori i čāvoro. Sir svako molo, jov čingirdža kašta, rakhja jāg i bova, pribešja ko skamind, te sikļol sir kerna buti zigarjengīre. Jov načudža paše peskire vasta daže ko samo tikno zigāritis. Ne bāro zigāris lija ande peski vasta i čudža po skamind. Čāvoro vilija zigāristir duj bolti, vimakhja len i čudža pāle de do samo štetos an zigāris – i kerdžapes džīvos! – zigāris lija te džal, gabadža sāre biš te štār giļa. Čāvoro piristrahadija, zagarudžape, ne mānuša pošunde zigāriski giļa, uhtine khangirjatir date

Priuhča khēre i zigarjengīro i phučja :

Daje, kon man jake lačes podrikirdža i počiņiņdža zigāris?

Phūrori pheņdža :

Daj nikon nasis, krome čāvoro pširdža trujal skamind.

Zigarjengīro lija te rodel čāvores, lača les an grengi štala i opdija les capla, sāri zorjatir.

Dava sanas tu, mīro čāvoro! Tu san bāredir murš sir me. Me tuke načudžum nisavi bāri vņimaņija i čudžum tut pe Patradžin te čingires kašta! Kana lathnepes portnoji i zasude zigarjengīreske trin idži. Tašarlatir podtrādija kareta andre dine štār grenca.

Zigarjengīro lija zigāris i gija ke kraļis. Pušuņdža kraļis kadava nēvipen, leske sis bāri hota, jov vigija peskire filačinatir lija an vasta pesko zigāris i noko jača terno. Jov pheņdža zigarjengīreske :

Jan ke me i doles, ko zakerdža miro zigāris!

Ne jov phenela:

Me kokoro les zakerdžom.

Pal so hohaves, dava nasanas tu! Dža i jan ke me doles, kon zakerdža zigāris!

Zigarjengīro gija i jaņdža ke kraļis čāvores. Kraļis leske phenel :

Dža i le trin korzini, pherde saunakune lovenca i otde len zigarjengīreske.

Ne zigarjengīreske kraļis pheņdža :

Čāvores me tuke pāle nadava. Svako berš me leske pleskirava deš tišči saunakune lovenca – mi podrakhel zigāris, feņu jov noko nalela te džal.

Čāvoro jača ko kraļis cela dešu trin berša. Kraļiske sis čaj i kana joj vibārija dasavi bāri, so vaštija te vidžal uže palo rom. Joj čiņdža lil i bičadža peski dādeske. So doj sis čindlo?

„Dāde, me kēravape so me som ņemo i javava doleski romni, kon man začuvela te rakirav!”

Kraļis vimukhja dasavi zan – kon vaštuvela te kērel so leski čaj javela te rakirel, dava dolela la romņake, ne kon dava namoginela te vikērel , doleske šēro tele čingirna.

Zajavdle būt terne čāve. Ne nikon naštija te kērel sop kraļiski čaj te zarakirel. Kraļis len sāren umardža i butedīr najavja ņikon. Ne peski baht gija te probin i zigarjengīro romano čāvo i phenel :

Kraļi, muk man te džav ki tiri čaj, me začuvava la te rakirel!

Vaš mange tu dža, ne tu džines so si čindlu an da lil, doj pu skamind? Me lijom sovlah te čingirav tele šēro svakuneske, koneske dava na videlapes.

Ne ki mange navidelapes, kraļi – tu vaštuvesa i miro šēro te čingires tele.

Ne ke tu jake jačes ke tire lava, dža, ne patom najavela rakirben.

Čāvoro zahuridžapes de šukar idži i gija andre de kraļiske čaki štuba.

Čajori variso visudža. Čāvo dija pativ :

Lačo dives!

Parikirav tut, zigarjengīro. Pribeš otphurdepes i poha.

Sāre ka da lava jov vipheņdža kokoro i nabutka pobešja, kamja te udžal.

Jač bahtali, miro kham!

Te javes bahtalo, zigarjengīro!

De vāvir dives beļveļe čāves khardža kraļis i kamja leske te čingirel šēro. Ne čāvo mangjapes,

Muk man da beļveļ iščo jekh molos ke joj!

Jakes čāvo noko zagija ke kraļiskiri čaj i phenela :

Lačes, so lačum tut dasavi hotnona!

Mange hota, so tu javjan, zigarjengīro! Raz tu javjan, jač i beš pal skamind.

Ne dava sāro čāvo rakirdža kokoro pesa i tel koncos pheņdža :

Lači beļveļasa!

Lačes tuke me džal, zigarjengīro!

Vāvir dives les vikhardža kraļis!

Javja paše do pora so mange čebi tuke te zčingirav tīro šēro, pal dova so koņčiņdžapes so tu mandir mangjan.

Tu že džines, kraļi – Dēvel mānušeske prostini trin moli,- čāvo otpheņdža.

Ne ladno, dža da beļveļ iščo ke joj.

Beļveļe čāvo gija ko kraļiskiri rakli i phenela:

Lači beļveļ, miro kham!

Parikirav, tut so javjan, zigarjengīro, beš ko skamind.

Terdžo, terdžo! Dikhes kada čūri ande miro vast? Me tut začinava po kuski, ke tu naotveķinesa so me tutir  sphučava.

Sir naotveķinava, zigarjengīro!

Phen mange, miro kham, tu piņčkires kraļiski ča?

Sir napiņčikarav, zigarjengīro.

A tu piņčkires i trin kraļiskire čāven?

Piņčkirava, zigarhengīro.

Dava šukār, so tu piņčkiresa. Sāre trin pšala kamle kraļiski ča, ne pšala nadžindle so sāre trin kamen jekhona. Ne – so kerdža čajori? Joj dova džiņdža so jone si pšala. Jekh beļveļ an gosti javja phūredīr pšal. Čajori podija les te hal, mukhja ke pe i zakerdža de jekh štuba. Rati javja vāvir pšal, i doles joj mukhja ke pe i zakerdža de vāvir štuba. Po koncos javja ternedir pšal , i doles joj jačadža ke pe. Vāvir tašarla joj mukhja pšala te zadenpes. Sāre trin pšala čurdinepes jekh po jekheste, ne čajori pheņdža: „Terdžon,pšala, naumaren jekh jekhes! Džan khēre, len svako tumendir deš tišči saunakune love i džan po trin targi. Kon mange janela samo šukardir veščos, doleskiri me javava.”

           Phūredīr pšal gija pe Buharesta i lača šukār glendaris.

Šun bariga,- jov phučja,- būt molel kada glendaris?

Ne deš tišči saunakasa

Dikhesa. A, nāni dava po kuč?

Podikha,  šukāredir, savo da čudno glendaris. Dikta de leste te dodikhesa de leste mulen i džiden mānušen.

           Podjavja te džal vāvir pšaleske . Jov gija pe vāvir foros i lathja kaftanos.

Šun bariga, būt molel kada kaftanos?

Ne, deš tišči saunakasa.

So tu rakires bariga! Kaj tu dikhjan kaftanos te molel deš tišči saunakaasa?

Jasavi ķimin, dikta savo da kaftanos! So tu po leste pašosa, jov tut an do samo pora dolidžala kaj tuke čebi te javes. Ne tu polijan, so dava si i me pal leste namangava kuč.

Podgija pora te džal ternedir pšaleske , i jov gija pe vāvir foros i dojavja ko jekh judos. Dolestir jov kiņdža phabuj. Phabuj sis čudno – ke da phabuj hala mūlo mānuš, jov kerlape džīdo. Da phabasa čāvo javja ke peski pšala. Ke javdle ko kraļiskiri čaj, jone lathle la mūļa. Ternedir čāvo dija lake te hal da phabuj, i joj javja ko dživipen. Ne pal koneste joj kana te džal palo rom? Joj  vigija palo rom pale ternedir pšaleste. So pal dava phenesa tu? Daj kraļiskiri čaj zarakirdža, zigarjengīro lija la palo rom i kerde  bāro bjav.

 

No latviešu valodas tulkojis Anatolijs Berezovskis.

  1. a
  2. b
  3. c
  4. d
  5. e
  6. f
  7. g
  8. h
  9. i
  10. j
  11. k
  12. l
  13. m
  14. n
  15. o
  16. p
  17. r
  18. s
  19. t
  20. u
  21. v
  22. z
  23. visas
 

Izmantošana nekomerciāliem mērķiem. Atsauce uz biedrību Ideju Forums obligāta.
e-pasts pasakas@pasakas.net 

Informācija grāmatu autoriem un tulkiem Mūsu draugi
Autortiesības © 2007 Biedrība Ideju Forums. Visas tiesības aizsargātas. Cube Systems – web dizains un izstrāde
  • Pasaku jaunumi
  • Pievienot Google